新开嗲猫猫Cafe! Hea食水準甜品拼盘

点解咁多间猫猫Cafe唔介绍，要介绍铜锣湾呢间？除了因为是新开之余，Hello Pinkey亲身去玩过，发觉8只猫猫好识Social，嗲到不得了，最难得是小店的食物都做得有心思又好食， 玩足一个下午都唔觉时间过，我真係唔愿走呀⋯⋯

猫猫公关出场

1. 霸气女皇波波

如果你见到一只坐于高处，极有霸气的，就一定是波波，这位女皇性格都友善，不过唔锺意人抱，但有食物，一样会冲落嚟畀你摸。

2. 女皇士兵则士

话晒女皇，点都要有只兵跟身，佢叫则士，身型最大，平时同女皇跟出跟入，不过女皇波波都有甜头畀佢嘅，就係一齐瞓嘞！

3. 靓仔张志明

猫界都有「张志明」，又真係几靓仔喎，仲好嗲，想冧死人咩？！

4. 超似样波斯孖宝

呢两只波斯兄弟煤炭和小鬼，个样似到⋯⋯分唔到边只打边只～佢哋都好嗲，会畀你抱住瞓觉。

煤炭抱抱下瞓着咗～好可爱呀～

5. 孖宝BB咖喱芝士

有对两个月的BB咖喱和芝士，超迷你好得意，不过未可以出来同大家玩，只可以望下牠们。

6. 劲量野口同学

呢只野口同学真係活力十足，四围走，跳又跳得高，好劲㗎！

为食猫乜都想食 $25餵猫猫

呢班猫仔，有得食就咩都得，见到摄影师部相机，拿拿声去睇下食唔食得。

摄影师影猫猫食物，哗，猫猫们简直不受控，围住摄影师，又扑上枱偷食。

想受猫猫欢迎，可以用$25买一碗南瓜鸡或鱼鱼鸡，猫猫一定走晒埋来，不过为免猫猫食太多，每小时只供应一碗猫食物㗎咋！

人都要食 高水準甜品

甜品拼盆

好多宠物Cafe的食物都麻麻地，但呢间真係做得有心思又好食，例如这个甜品拼盆，9款甜品包括玫瑰绿茶蛋糕、果挞、宇治金时、抹茶多士、香蕉朱古力榛子酱、可可米球、薰衣草烧棉花糖，个人最喜欢是木槺布甸，入口即溶，另外喷烟的杨枝甘露，用鲜芒果汁打成，清新好饮。

Mr. & Mrs.招牌二人甜品拼盘 $280

猫猫朱古力热饮

朱古力热饮用两种比利时朱古力沖成，入口几浓郁，小心猫猫张志明，佢会走上枱偷奶饮㗎！

玫瑰鸡翼

小店3月中会开始供应鹹点，包括这个玫瑰醉鸡翼。

Mr. & Mrs. Cat Cafe

地址：铜锣湾富明街2-6号宝明大厦1楼

电话：5116 1244

营业时间：2pm-11pm

备注：建议预先订位